المتابعون

الأحد، 11 سبتمبر، 2011

فيكم أحلى الصفات (النص الفائز فى مسابقة القلم الحر)(المركز الثالث )

(النص مهدى الى الثوره المصرية)

الثوره مش بشاوره

تمسح فى ثوانى ال خطأ ال فات

ولا هى مغامره

أزعق ولم عليك الخلق ولاد ويا بنات

ولا هى كيكه

ناس تكلها وناس تلحس باقى الفتات

الثوره ياولاد مصر

وتد مغروس فى الحق محتاج ثبات

الثوره نبرة

فرح صاحت فى صوت السكات

الثوره يعنى لمه

وضله وشله ورده وفله وضحكات

الثوره كام شهيد من غير وداع فات

الثوره أم صبرت

على الولاده والوجع والأهات

الثوره يعنى ثوره

فى المعانى فى الأغانى فى رنة الكلمات

الثوره يعنى أيد

بتسلم على أيد

وصوابع بتشد تصحى الحب ال مات

الثوره دار

الثوره قرار

الثوره إراده

وتروس شغاله تغزل فى رتق الزمن إل فات

الثوره سواقى

تغنى طول الليل أغانى تروى عطش النبات

الثوره يعنى مصر ومصر

جوه فى القلوب مرويه بالنبضات

الثوره يعنى مصر ومصر

جذورحضاره معلومه فى كل الجهات

الثوره يعنى مصر

ومصر نيل ونخيل وأهرامات

الثوره هامة مصر مرفوعه فوق صواريها أعلى ريات

الثوره أنتم يامصريين

مغروسه فيكم أحلى الصفات

هناك تعليقان (2):

نور القمر يقول...

مساء الخير اخي ..
نص رائع بالفعل واتمنى منى لكل مصري حر تحقيق مطلباه ..
فمصر تستحق ..
مع تحياتى نور ..

خالد احمد محمود يقول...

نور القمر

شكرى وتقديرى لزيارتك الكريمه
نعم مصر تستحق اكثر
كونى دوما هنا.