نشرة الأخبار

نشرة الأخبار
منشار بينشر خبرنا
لا فى يوم مر نسمة
ولا قالوا اليوم استمتعوا بنور قمرنا
قتلنا جرحنا نقلنا
أو التقوا على مائدة شرفنا
كل القنوات ترتل قرفنا
حتى لما الربيع فتح زهوره
كرروها لينا هرمنا هرمنا
المخرج مكرر
والمذيع مكرر
والتتر مكرر .... يعنى أنتباه
فى كلام ح يقهرنا
الصور من كل لون أحمرها بهرنا
تقول بس أحنا ال فى الكون
ال دافعين للعكننه مهرها
خيام بتموت لان الوتد ال ساندها قهرها
وصدى الصوت ذئاب بتعوى عاجبها وترها
والورق مكتوبه سطوره من ورا ال مهرها
والقدس مسنود على ساسه وفى سوس بينخرها
والرصاص زوم على الكاميرا بترجيف ايد ال صورها
وعادى كل الكلام
بنتعشى ونام وكمان بنكمل فى الليالى سمرها
هو مش أحنا كوتشينه مشكوك جوا بعضها ورقها
بس الجوكر شكله غريب على العيله يحميها وهو ال سرقها
الساعة تسعه عند كل العرب ساعة نشر الغسيل
والهوا بينشر قرفها
يضحك المذيع بيستظرف
والدم عندنا أصلا خفيف
نلتقى على رأس الساعة
وبعد كل الدم ال نزف فاصل أغانى
هو أحنا مش أمه قتلها ترفها .....