الى ست الحبايب

وين الكلمات
حدش شاف الكلمات
ليه حاسس إن بنات أفكارى عنست
ودلوقتى بالذات
فصيح أمبارح كنت
وعامل شاعر
وهاتك يامعانى
ولما الكلام بقى على ست الكل
أتبلدت
أتجمدت
راحت منى الأنا ومن تانى اتولدت
كانى لسه فى تاتا تاتا
اوعك اخوكى يابنت
والصوت
كراوان
وانا ازيد البكا صدى
وهى تطبطب نام نام ياحمام
ساعتها هى كانت
بتغرس جواى معنى الحب
والحضن كان عندها روح بتعشقها
وانا كل ال حصل زمان دلوقتى
عندى مجرد ذكريات
وين الكلمات
ال تجيب حقك
من جواى
قول ياشاعر
يالى بلعت لسانك
واتخرست
هاتى كفك اعد خطوط العمر فيه
ولو أقدر منى كنت زدت
هاتى عينك تضوى ضلمتى
عارفك حتقولى هى فيها
طيب خدى عيونى
ماهى عيونك بتشوفنى من اتولدت
خدى منى كل حاجة
مش انا فى وقت كان
جوه منك جنب قلبك سكنت وأستكنت
كيف أرد الجميل
حتى بالكلمات مش قادر
وين الكلمات